شناخت:ممتاز نقاد، ماہرِ اقبالیات، غالب شناس اور انگریزی ادب کے استاد

اسلوب احمد انصاری 1925ء کو دہلی میں پیدا ہوئے۔ انہوں نے 1946ء میں علی گڑھ مسلم یونیورسٹی سے انگریزی ادب میں ایم اے فرسٹ کلاس کے ساتھ کیا اور 1947ء میں اسی جامعہ کے شعبۂ انگریزی میں لکچرر مقرر ہوئے۔ بعد ازاں اعلیٰ تعلیم کے لیے انگلستان گئے اور آکسفورڈ یونیورسٹی سے گریجویٹ ہوئے۔ 1959ء میں ریڈر، 1967ء میں پروفیسر اور 1965ء سے 1984ء تک علی گڑھ مسلم یونیورسٹی کے شعبۂ انگریزی کے صدر رہے۔ انگریزی زبان و ادب کی تدریس اور تحقیق میں ان کی خدمات کو خاص مقام حاصل ہے۔

اسلوب احمد انصاری کا شمار اردو کے ممتاز نقادوں، ماہرینِ اقبالیات اور غالب شناس اہلِ قلم میں ہوتا ہے۔ ان کی تنقید کسی مخصوص ادبی مکتبِ فکر کی پابند نہیں بلکہ آزاد، متوازن اور متن پر مبنی ہے، جو ان کے ذہن کی اوٹونومی (خودمختاری) کا پتہ دیتی ہے۔ وہ ادبی فن پاروں کی تفہیم، معنوی جہات اور فنی محاسن کو نمایاں کرنے پر زور دیتے ہیں اور معروضی تجزیے سے گزرتے ہوئے شعری فن پارے کو معنوی سطح پر اجاگر کرتے ہیں۔ ان کی تحریروں میں عیوب سے زیادہ محاسن کی تلاش کا ہمدردانہ تنقیدی رویہ نمایاں نظر آتا ہے، جبکہ غالب، اقبال، اردو ناول اور شعری تنقید ان کے خصوصی موضوعات رہے۔ ان کا طرزِ نگارش سادہ اور واضح ہے، جہاں وہ باتوں کو کھل کر بیان کرنا پسند کرتے ہیں، جس کی وجہ سے کہیں کہیں طوالت اور تکرار کی صورت بھی پیدا ہو جاتی ہے۔

ان کی اہم اردو تصانیف میں "ادب اور تنقید"، "نقشِ غالب"، "اقبال کی تیرہ نظمیں"، "نقشِ اقبال"، "اقبال کی منتخب نظمیں اور غزلیں"، "اقبال: حرف و مومن"، "نقش ہائے رنگ رنگ" (غالب)، "اطرافِ رشید احمد صدیقی"، "اردو کے پندرہ ناول"، "آئینہ خانے میں"، "تنقیدی تبصرہ" اور "حرف چند" شامل ہیں۔ انہوں نے "غزل تنقید" (دو جلدیں)، "غالب: جدید تنقیدی تناظرات"، "اقبال: جدید تنقیدی تناظرات" اور "نذرِ منظور" کی ترتیب و تدوین بھی کی۔ انگریزی میں بھی ان کی آٹھ دس تصانیف اور مرتبہ کتابیں شائع ہوئیں، جن میں ولیم بلیک پر طبع زاد کتاب اور ملٹن، جان ڈن، سر والٹر ریلے، سر سید احمد خان اور علامہ اقبال پر مرتبہ علمی کام شامل ہیں۔ شیکسپیئر سے متعلق ان کے انگریزی مضامین کو مغرب میں بے حد پسند کیا گیا اور ان کے حوالے بھی دیے جاتے ہیں۔

اسلوب احمد انصاری صحافت اور ادبی ادارت سے بھی وابستہ رہے۔ انہوں نے 1979ء سے 2001ء تک اردو کے ممتاز تنقیدی جریدے "نقد و نظر" کی ادارت کی۔ اس کے علاوہ وہ علیگڑھ جرنل آف انگلش اسٹڈیز (Aligarh Journal of English Studies) اور علی گڑھ کریٹیکل مسیلینی (Aligarh Critical Miscellany) کے بانی مدیر بھی رہے۔ ان کی علمی و ادبی خدمات کے اعتراف میں انہیں ساہتیہ اکادمی ایوارڈ، غالب ایوارڈ اور دیگر اہم اعزازات سے نوازا گیا۔

وفات: یکم مئی 2016 کو علی گڑھ میں انتقال ہوا۔