نگاہوں میں جو منظر ہو وہی سب کچھ نہیں ہوتا

بہت کچھ اور بھی پیارے پس دیوار ہوتا ہے

جو چاہتا ہے کہ بن جائے وہ بڑا شاعر

وہ جا کے دوستی گانٹھے کسی مدیر کے ساتھ

شوہروں سے بیبیاں لڑتی ہیں چھاپہ مار جنگ

رابطہ ان کا بھی کیا کشمیر کی وادی سے ہے

جو اپنا بھائی ہے رہتا ہے وہ پاؤں کی ٹھوکر میں

مگر جورو کا بھائی تو گلے کا ہار ہوتا ہے

پوپلے منہ سے چنے کھانا نہیں ممکن حضور

آ نہیں سکتی جوانی لوٹ کے معجون سے

وہی سلوک زمانے نے میرے ساتھ کیا

کیا تھا جیسا مشرف نے بے نظیر کے ساتھ

یہ رشوت کے ہیں پیسے دن میں کیسے لوں مسلماں ہوں

میں لے سکتا نہیں سر اپنے یہ الزام روزے میں

جو بیٹھا ہے بگلا بھگت کی طرح

وہی ہم کو اصلی شکاری لگے

وہ مسجد ہو کہ مندر ہو ادب ہو یا سیاست ہو

وہی ہے جنگ کرسی کی وہی دستار کا جھگڑا

سیاست میں ایسی اچھل کود ہے

کہ ہر ایک نیتا مداری لگے

وفور عشق کے جذبے سے ہو گئی سرشار

نکل پڑی ہے مریدن جدید پیر کے ساتھ

چھڑا جب ان کے گھر جھگڑا تو ان کی عقل چکرائی

جو سلجھاتے رہے تھے عمر بھر بازار کا جھگڑا

خبر کر دو محلے میں اگر چھیڑا کسی نے بھی

اسی دم میں مچا سکتا ہوں قتل عام روزے میں

اس زمانے کی عجب تشنہ لبی ہے اے ظفرؔ

پیاس اس کی صرف بجھتی ہے ہمارے خون سے