ہم بھی کہنے لگے ہیں رات کو رات

ہم بھی گویا خراب ہونے لگے

عتاب و قہر کا ہر اک نشان بولے گا

میں چپ رہا تو شکستہ مکان بولے گا

روز سنتا ہوں میں ہنسنے کی صدا

کون یہ میرے سوا ہے مجھ میں

سمٹے ہوئے جذبوں کو بکھرنے نہیں دیتا

یہ آس کا لمحہ ہمیں مرنے نہیں دیتا

گمان ہوتا ہے مجھ کو تمہارے آنے کا

ہوا ادھر سے دبے پانوں جب گزرتی ہے

اجنبی خوشبو کی آہٹ سے مہک اٹھا بدن

قہقہوں کے لمس سے خوف خزاں روشن ہوا

میرے اندر نہاں ہے عکس مرا

آئینے میں ہے آپ کا پرتو

دریدہ جیب گریباں بھی چاک چاہتا ہے

وہ عشق کیا ہے جو دامن کو پاک چاہتا ہے

ذکیؔ ہمارا مقدر ہیں دھوپ کے خیمے

ہمیں نہ راس کبھی آیا سائبان کوئی