jo bhī hai dil meñ aap ke khul kar batā.iye hameñ

kahte haiñ aap Thiik haiñ rahte haiñ be-qarār se

jo bhi hai dil mein aap ke khul kar bataiye hamein

kahte hain aap Thik hain rahte hain be-qarar se

phir vahī ḳhvāb vahī zid nahīñ 'āqib-sābir'

ham usūloñ se baġhāvat nahīñ karne vaale

phir wahi KHwab wahi zid nahin 'aqib-sabir'

hum usulon se baghawat nahin karne wale

akele meñ mujhe sharmindagī mahsūs hotī hai

na jaane kitne jazboñ se shanāsā.ī nahīñ hotī

akele mein mujhe sharmindagi mahsus hoti hai

na jaane kitne jazbon se shanasai nahin hoti

girāñ hai itnī laboñ par hurūf kī zanjīr

zabāñ pe qaid ho jaise kalām karne kī

giran hai itni labon par huruf ki zanjir

zaban pe qaid ho jaise kalam karne ki

mire chāroñ taraf bas raushnī hī raushnī hai

ki ik sho'la mirī āñkhoñ kā taara ho gayā hai

mere chaaron taraf bas raushni hi raushni hai

ki ek sho'la meri aankhon ka tara ho gaya hai

savāl ye hai ki dasht-e-badan kā kyā hogā

agar junūñ kā parinda qafas meñ aayā na.iiñ

sawal ye hai ki dasht-e-badan ka kya hoga

agar junun ka parinda qafas mein aaya nain

vahāñ se pahle kahīñ justujū na mar jaa.e

jahāñ umiid koī rāsta nikāltī hai

wahan se pahle kahin justuju na mar jae

jahan umid koi rasta nikalti hai