جتیندر موہن سنہا رہبر (1911ء–1993ء) استاد، شاعر، ادیب اور مجاہدِ آزادی تھے۔ ان کا اصل نام جتیندر موہن سنہا تھا۔ وہ 24 ستمبر 1911ء کو بجنور، اتر پردیش میں پیدا ہوئے۔ گاندھیائی فلسفے کے پُرجوش پیروکار ہونے کے باعث انھوں نے قانون کا پیشہ ترک کرکے تحریکِ آزادی میں حصہ لیا۔ 1930ء میں انھیں قید بھی کیا گیا۔ بعد ازاں انھوں نے نیشنل کالج، لکھنؤ میں انگریزی ادب کے استاد کی حیثیت سے تدریسی خدمات انجام دیں۔

رہبر نے اپنی 82 سالہ زندگی میں سیاسی اور سماجی موضوعات پر نثر و نظم میں کثرت سے اظہارِ خیال کیا۔ ہندی، انگریزی، سنسکرت، اردو اور فارسی زبانوں پر عبور رکھنے کے باوجود انھوں نے شاعری کے لیے اردو زبان کا انتخاب کیا۔ ان کی شاعری میں گہرے خیالات، جرأت، دیانت داری اور پختہ نظریات کی عکاسی ملتی ہے۔ ان کا کلام اپنے عہد اور ذاتی افکار کا سچا ترجمان ہے۔

رہبر ایک گہری روحانی شخصیت کے مالک بھی تھے۔ انھوں نے انسان اور خدا کے باہمی رشتے اور اس یقین کو اپنی شاعری میں نہایت اپنائیت سے بیان کیا کہ نیکی کبھی رائیگاں نہیں جاتی۔ ان کی شاعری میں آفاقی پیغام، نیکی، مہربانی اور سچائی پر ایک معصومانہ یقین نمایاں ہے۔ 12 اگست 1993ء کو ان کا انتقال ہوا۔