agar zaban se na ashk-e-rawan se guzrega

agar zabāñ se na ashk-e-ravāñ se guzregā

to phir ġhubār-e-tabī.at kahāñ se guzregā

hamāre naqsh-e-qadam raah meñ banā.e rakho

abhī zamāna isī kahkashāñ se guzregā

abhī to bijliyāñ TūTeñgī ḳhirman-e-dil par

abhī to qāfila shahr-e-butāñ se guzregā

nasīb hoñgī use sarfarāziyāñ kyā kyā

jo sar jhukā ke tire āstāñ se guzregā

usī se rāste pūchheñge ḳhairiyat merī

vo mere shahr meñ tanhā jahāñ se guzregā

maiñ sochtā huuñ rahegā jo fāsla qaa.em

zamāna un ke mire darmiyāñ se guzregā

nasīb hoñgī use kāmyābiyāñ 'nazmī'

ḳhushī ke saath jo har imtihāñ se guzregā

agar zaban se na ashk-e-rawan se guzrega

to phir ghubar-e-tabiat kahan se guzrega

hamare naqsh-e-qadam rah mein banae rakho

abhi zamana isi kahkashan se guzrega

abhi to bijliyan TuTengi KHirman-e-dil par

abhi to qafila shahr-e-butan se guzrega

nasib hongi use sarfaraaziyan kya kya

jo sar jhuka ke tere aastan se guzrega

usi se raste puchhenge KHairiyat meri

wo mere shahr mein tanha jahan se guzrega

main sochta hun rahega jo fasla qaem

zamana un ke mere darmiyan se guzrega

nasib hongi use kaamyabiyan 'nazmi'

KHushi ke sath jo har imtihan se guzrega