aks zaKHmon ka jabin par nahin aane deta

aks zaḳhmoñ kā jabīñ par nahīñ aane detā

maiñ ḳharāsh apne yaqīñ par nahīñ aane detā

is liye maiñ ne ḳhatā kī thī ki duniyā dekhūñ

varna vo mujh ko zamīñ par nahīñ aane detā

umr bhar sīñchte rahne kī sazā paa.ī hai

peḌ ab chhāñv hamīñ par nahīñ aane detā

jhuuT bhī sach kī tarah bolnā aatā hai use

koī luknat bhī kahīñ par nahīñ aane detā

apne is ahd kā insāf hai tāqat kā ġhulām

aañch bhī kursī-nashīñ par nahīñ aane detā

chāhtā huuñ ki use pūjnā chhoḌūñ lekin

kufr jo ḳhuuñ meñ hai diiñ par nahīñ aane detā

aks zaKHmon ka jabin par nahin aane deta

main KHarash apne yaqin par nahin aane deta

is liye main ne KHata ki thi ki duniya dekhun

warna wo mujh ko zamin par nahin aane deta

umr bhar sinchte rahne ki saza pai hai

peD ab chhanw hamin par nahin aane deta

jhuT bhi sach ki tarah bolna aata hai use

koi luknat bhi kahin par nahin aane deta

apne is ahd ka insaf hai taqat ka ghulam

aanch bhi kursi-nashin par nahin aane deta

chahta hun ki use pujna chhoDun lekin

kufr jo KHun mein hai din par nahin aane deta