dil ke dagh mein sisa hai aur zaKHm-e-jigar mein tanba hai

dil ke daaġh meñ siisa hai aur zaḳhm-e-jigar meñ tāñbā hai

itnā bhārī siina le kar shaḳhs āvāra phirtā hai

kāñch ke reze tez havā meñ bāvle uḌte phirte haiñ

nañge badan kī chāñdnī se phir taarā taarā girtā hai

aadhe peḌ pe sabz parinde aadhā peḌ āsebī hai

kaise khule ye rām-kahānī kaun sā hissa merā hai

kaale devtā muTThī bhar bhar suune gharoñ meñ pheñkte haiñ

kohr-zada bastī ke chauk meñ raakh kā ūñchā Tiila hai

sard shaboñ kā pochhne vaalo in rātoñ ke taare duur

dhuñdle chāñd kī nabzeñ gūñgī aag kā chehra niilā hai

pīploñ vaalī galiyāñ ujḌī Dher haiñ piile pattoñ ke

sāmne vaalī surḳh havelī meñ bhūtoñ kā Derā hai

dil ke dagh mein sisa hai aur zaKHm-e-jigar mein tanba hai

itna bhaari sina le kar shaKHs aawara phirta hai

kanch ke reze tez hawa mein bawle uDte phirte hain

nange badan ki chandni se phir tara tara girta hai

aadhe peD pe sabz parinde aadha peD aasebi hai

kaise khule ye ram-kahani kaun sa hissa mera hai

kale dewta muTThi bhar bhar sune gharon mein phenkte hain

kohr-zada basti ke chauk mein rakh ka uncha Tila hai

sard shabon ka pochhne walo in raaton ke tare dur

dhundle chand ki nabzen gungi aag ka chehra nila hai

piplon wali galiyan ujDi Dher hain pile patton ke

samne wali surKH haweli mein bhuton ka Dera hai