faqirana hai dil muqim uski rah ka

faqīrāna hai dil muqīm us kī rah kā

ġharaz kyā ki muhtāj ho bādshah kā

ḳhadañg aah kā ai falak be-tarah hai

bharosā tū tāroñ kī mat kar zirah kā

ḳharābāt kī jab se lazzat paḌī hai

chhuTā baiThnā masjid-o-ḳhānqah kā

tavāf-e-haram tujh ko zāhid mubārak

mirā aur terā nahīñ saath rah kā

sanam-ḳhāna jaatā huuñ tū mujh ko nāhaq

na bahkā na bahkā na bahkā na bahkā

tire muñh se kuchh bū jo aatī hai mai kī

dimāġh-e-dil us vaqt jaatā hai mahkā

raqīboñ ke dil chaak misl-e-katāñ hoñ

guzār us taraf ho agar apne rah kā

tirī āshnā.ī meñ kyā ham ne paayā

diyā naqd-e-dil aur apnī girah kā

chamak kar tū ai barq mat maar chashmak

to mastoñ kī ātish ko mat aur dahkā

tabhī lutf hai sāqiyā mai-kashī kā

ki tū bhī bahak aur mujh ko bhī bahkā

kabhī tujh se 'inshā' ne bosa na māñgā

gunahgār hai vo faqat ik nigah kā

faqirana hai dil muqim us ki rah ka

gharaz kya ki muhtaj ho baadshah ka

KHadang aah ka ai falak be-tarah hai

bharosa tu taron ki mat kar zirah ka

KHarabaat ki jab se lazzat paDi hai

chhuTa baiThna masjid-o-KHanqah ka

tawaf-e-haram tujh ko zahid mubarak

mera aur tera nahin sath rah ka

sanam-KHana jata hun tu mujh ko nahaq

na bahka na bahka na bahka na bahka

tere munh se kuchh bu jo aati hai mai ki

dimagh-e-dil us waqt jata hai mahka

raqibon ke dil chaak misl-e-katan hon

guzar us taraf ho agar apne rah ka

teri aashnai mein kya hum ne paya

diya naqd-e-dil aur apni girah ka

chamak kar tu ai barq mat mar chashmak

to maston ki aatish ko mat aur dahka

tabhi lutf hai saqiya mai-kashi ka

ki tu bhi bahak aur mujh ko bhi bahka

kabhi tujh se 'insha' ne bosa na manga

gunahgar hai wo faqat ek nigah ka