fareb gham hi sahi dil ne aarzu kar li

fareb ġham hī sahī dil ne aarzū kar lī

burā hī kyā hai agar terī justujū kar lī

ġhalat hai jazba-e-dil par nahīñ koī ilzām

ḳhushī milī na hameñ jab to ġham kī ḳhū kar lī

biThā ke sāmne tum ko bahār meñ pī hai

tumhāre riñd ne tauba bhī rū-ba-rū kar lī

vafā ke naam se Dartā huuñ ai shah-e-ḳhūbāñ

tum aa.e bhī to nazar jānib subū kar lī

kahāñ se ā.eñge andāz be-panāhī ke

abhī se jeb-e-tamannā agar rafū kar lī

zamāna de na sakā fursat-e-junūñ 'anjum'

bahut huā to ghaḌī bhar ko hā-o-hū kar lī

fareb gham hi sahi dil ne aarzu kar li

bura hi kya hai agar teri justuju kar li

ghalat hai jazba-e-dil par nahin koi ilzam

KHushi mili na hamein jab to gham ki KHu kar li

biTha ke samne tum ko bahaar mein pi hai

tumhaare rind ne tauba bhi ru-ba-ru kar li

wafa ke nam se Darta hun ai shah-e-KHuban

tum aae bhi to nazar jaanib subu kar li

kahan se aaenge andaz be-panahi ke

abhi se jeb-e-tamanna agar rafu kar li

zamana de na saka fursat-e-junun 'anjum'

bahut hua to ghaDi bhar ko ha-o-hu kar li