hai baqa ishq ki rahon mein fana ho jaana

hai baqā ishq kī rāhoñ meñ fanā ho jaanā

ḳhud meñ rahnā na kabhī ḳhud se judā ho jaanā

apne hone kā hai ehsās tire hone se

ġhair mumkin hai mirā tujh se judā ho jaanā

maiñ usī lamha samajh letā huuñ ḳhud ko kāfir

jis meñ ho tere ḳhayāloñ se judā ho jaanā

uTh ke jaanā tirā pahlū se mire lagtā hai

jism kī qaid se sāñsoñ kā rihā ho jaanā

ham ko lagtā hai ki sau sajdoñ se behtar hai yahī

ek sajde kā tire dar pe adā ho jaanā

jā ke us shoḳh ko koī ye batā de 'zīshān'

achchhā lagtā hai hameñ us kā ḳhafā ho jaanā

hai baqa ishq ki rahon mein fana ho jaana

KHud mein rahna na kabhi KHud se juda ho jaana

apne hone ka hai ehsas tere hone se

ghair mumkin hai mera tujh se juda ho jaana

main usi lamha samajh leta hun KHud ko kafir

jis mein ho tere KHayalon se juda ho jaana

uTh ke jaana tera pahlu se mere lagta hai

jism ki qaid se sanson ka riha ho jaana

hum ko lagta hai ki sau sajdon se behtar hai yahi

ek sajde ka tere dar pe ada ho jaana

ja ke us shoKH ko koi ye bata de 'zishan'

achchha lagta hai hamein us ka KHafa ho jaana