ہے بقا عشق کی راہوں میں فنا ہو جانا

ہے بقا عشق کی راہوں میں فنا ہو جانا

خود میں رہنا نہ کبھی خود سے جدا ہو جانا

اپنے ہونے کا ہے احساس ترے ہونے سے

غیر ممکن ہے مرا تجھ سے جدا ہو جانا

میں اسی لمحہ سمجھ لیتا ہوں خود کو کافر

جس میں ہو تیرے خیالوں سے جدا ہو جانا

اٹھ کے جانا ترا پہلو سے مرے لگتا ہے

جسم کی قید سے سانسوں کا رہا ہو جانا

ہم کو لگتا ہے کہ سو سجدوں سے بہتر ہے یہی

ایک سجدے کا ترے در پہ ادا ہو جانا

جا کے اس شوخ کو کوئی یہ بتا دے ذیشانؔ

اچھا لگتا ہے ہمیں اس کا خفا ہو جانا