ho teri yaad ka dil mein guzar aahista aahista

ho terī yaad kā dil meñ guzar āhista āhista

kare ye chāñd sahrā meñ safar āhista āhista

bahut tezī se duniyā chhīn legī jab tujhe mujh se

tū phir is dil meñ aise mat utar āhista āhista

ki ham dhoke meñ rakkheñ dostoñ ko ḳhush-kalāmī se

hameñ aa hī gayā ye bhī hunar āhista āhista

kahīñ se ek vīrānī kā saayā phailtā aayā

hue be-rañg sab dīvār-o-dar āhista āhista

na TuuTe aur kuchh din tujh se rishta is tarah merā

mujhe barbād kar de tū magar āhista āhista

ye ḳhāmoshī yahāñ kā husn hai rakhnā ḳhayāl is kā

'kamāl' is dasht-e-vīrāñ se guzar āhista āhista

ho teri yaad ka dil mein guzar aahista aahista

kare ye chand sahra mein safar aahista aahista

bahut tezi se duniya chhin legi jab tujhe mujh se

tu phir is dil mein aise mat utar aahista aahista

ki hum dhoke mein rakkhen doston ko KHush-kalami se

hamein aa hi gaya ye bhi hunar aahista aahista

kahin se ek virani ka saya phailta aaya

hue be-rang sab diwar-o-dar aahista aahista

na TuTe aur kuchh din tujh se rishta is tarah mera

mujhe barbaad kar de tu magar aahista aahista

ye KHamoshi yahan ka husn hai rakhna KHayal is ka

'kamal' is dasht-e-viran se guzar aahista aahista