اتنے بے مہر موسموں میں بھی اس نے حد کر دی مہربانی کی

اتنے بے مہر موسموں میں بھی اس نے حد کر دی مہربانی کی

کیا مہمان مجھ مسافر کو اور پھر دل سے میزبانی کی

اس کے انداز سے جھلکتا تھا کوئی کردار داستانوں کا

اس کی آواز سے بکھرتی تھی کوئی خوشبو کسی کہانی کی

شام خاموش تھی سو اس نے بھی گفتگو سے گریز کرتے ہوئے

جلتے جذبوں کو رکھا آنکھوں میں جسم سے دل کی ترجمانی کی

پہلے اس نے گلے لگایا اور مجھ کو پھر لے گئی بہشتوں میں

ایک بات اس نے کی زمینی سی دوسری بات آسمانی کی

اب تو حالت ہوئی رعایا سی اب وہ تاریخ کیا کہیں خاورؔ

دل کی جو سلطنت ملی تھی ہمیں اس پہ کس کس نے حکمرانی کی