jabin ka chand banun aankh ka sitara banun

jabīñ kā chāñd banūñ aañkh kā sitārā banūñ

kisī jamāl-e-shafaq-tāb kā sahārā banūñ

mohabbatoñ kī shikastoñ kā ik ḳharāba huuñ

ḳhudārā mujh ko girāo ki maiñ dobārā banūñ

ye bhīgī bhīgī havāoñ meñ sard sard mahak

jo dil kī aag meñ utre to kuchh gavārā banūñ

har ek ġhuncha-dahan kā yahī taqāzā hai

jamāliyāt kā maiñ āḳhirī shumāra banūñ

zamāna manzar-e-mauhūm kā hai shaidā.ī

ye aarzū hai koī daur kā nazārā banūñ

har ek mauj ho uThtī javāniyoñ kī dhanak

banūñ to aise samundar kā maiñ kināra banūñ

mujhe lagan ki maiñ ā.īne kī misāl rahūñ

use havas ki rivāyāt-e-sañg-e-ḳhārā banūñ

ġhazal vo kyuuñ na ho 'fāriġh' dur-e-adan ki jahāñ

har ek sher ko zid ho ki shāh-pāra banūñ

jabin ka chand banun aankh ka sitara banun

kisi jamal-e-shafaq-tab ka sahaara banun

mohabbaton ki shikaston ka ek KHaraba hun

KHudara mujh ko girao ki main dobara banun

ye bhigi bhigi hawaon mein sard sard mahak

jo dil ki aag mein utre to kuchh gawara banun

har ek ghuncha-dahan ka yahi taqaza hai

jamaliyat ka main aaKHiri shumara banun

zamana manzar-e-mauhum ka hai shaidai

ye aarzu hai koi daur ka nazara banun

har ek mauj ho uThti jawaniyon ki dhanak

banun to aise samundar ka main kinara banun

mujhe lagan ki main aaine ki misal rahun

use hawas ki riwayat-e-sang-e-KHara banun

ghazal wo kyun na ho 'farigh' dur-e-adan ki jahan

har ek sher ko zid ho ki shah-para banun