jo saf-go hon to unchi jagah khaDa milunga

jo sāf-go hoñ to ūñchī jagah khaḌā milūñgā

vagarna tujh ko kahīñ ḳhaak meñ paḌā milūñgā

tū sāloñ baad bhī mujh ko manāne aa.e to

maiñ apnī ek hī zid par tujhe aḌā milūñgā

tū ḳhud ko yūñhī girātā rahā to āḳhir-kār

maiñ tere qad se tujhe sau gunā baḌā milūñgā

lakīr khīñch ke rakhnā tasallī kī ḳhātir

ki apnī had se na yaksar tujhe baḌhā milūñgā

huuñ bā-vafā to mirā sar nahīñ jhukegā kabhī

jo bevafā huuñ to phir sharm se gaḌā milūñgā

sadāqateñ mirī shādāb hī rakheñgī mujhe

maiñ zard pattā nahīñ huuñ ki jo jhaḌā milūñgā

sitam se bhaag ke jiinā hai maut se bad-tar

barā-e-haq maiñ tujhe daar par chaḌhā milūñgā

jo saf-go hon to unchi jagah khaDa milunga

wagarna tujh ko kahin KHak mein paDa milunga

tu salon baad bhi mujh ko manane aae to

main apni ek hi zid par tujhe aDa milunga

tu KHud ko yunhi giraata raha to aaKHir-kar

main tere qad se tujhe sau guna baDa milunga

lakir khinch ke rakhna tasalli ki KHatir

ki apni had se na yaksar tujhe baDha milunga

hun ba-wafa to mera sar nahin jhukega kabhi

jo bewafa hun to phir sharm se gaDa milunga

sadaqaten meri shadab hi rakhengi mujhe

main zard patta nahin hun ki jo jhaDa milunga

sitam se bhag ke jina hai maut se bad-tar

bara-e-haq main tujhe dar par chaDha milunga