tere qarib pahunchne ke Dhang aate the

tire qarīb pahuñchne ke Dhañg aate the

ye ḳhud-fareb magar raah bhuul jaate the

hameñ aziiz haiñ in bastiyoñ kī dīvāreñ

ki jin ke saa.e bhī dīvār bante jaate the

satīz-e-naqsh-e-vafā thā ta.alluq-e-yārāñ

vo zaḳhma-e-rag-e-jāñ chheḌ chheḌ jaate the

vo aur kaun tire qurb ko tarastā thā

fareb-ḳhurda hī terā fareb khāte the

chhupā ke rakh diyā phir āgahī ke shīshe ko

is ā.īne meñ to chehre bigaḌte jaate the

ab ek umar se dukh bhī koī nahīñ detā

vo log kyā the jo āThoñ pahar rulāte the

vo log kyā hue jo ūñghtī huī shab meñ

dar-e-firāq kī zanjīr sī hilāte the

tere qarib pahunchne ke Dhang aate the

ye KHud-fareb magar rah bhul jate the

hamein aziz hain in bastiyon ki diwaren

ki jin ke sae bhi diwar bante jate the

satiz-e-naqsh-e-wafa tha talluq-e-yaran

wo zaKHma-e-rag-e-jaan chheD chheD jate the

wo aur kaun tere qurb ko tarasta tha

fareb-KHurda hi tera fareb khate the

chhupa ke rakh diya phir aagahi ke shishe ko

is aaine mein to chehre bigaDte jate the

ab ek umar se dukh bhi koi nahin deta

wo log kya the jo aaThon pahar rulate the

wo log kya hue jo unghti hui shab mein

dar-e-firaq ki zanjir si hilate the