ye kya hua ki sabhi ab to dagh jalne lage

ye kyā huā ki sabhī ab to daaġh jalne lage

havā chalī to lahū meñ charāġh jalne lage

miTā gayā thā lahū ke sabhī nishāñ qātil

magar jo shaam Dhalī sab charāġh jalne lage

ik aisī fasl utarne ko hai gulistāñ meñ

zamāna dekhe ki phūloñ se baaġh jalne lage

nigāh-e-tā.ir-e-zindāñ uThī thī ghar kī taraf

ki soz-e-ātash-e-giryāñ se daaġh jalne lage

ab us maqām pe hai mausamoñ kā sard mizāj

ki dil sulagne lage aur dimāġh jalne lage

ab aa bhī jā ki yuuñ hī duur duur rahne se

ye mere hoñT vo tere ayāġh jalne lage

nahā ke nahr se 'sālim' parī vo kyā niklī

ki tāb-e-husn se ḳhud astabāġh jalne lage

ye kya hua ki sabhi ab to dagh jalne lage

hawa chali to lahu mein charagh jalne lage

miTa gaya tha lahu ke sabhi nishan qatil

magar jo sham Dhali sab charagh jalne lage

ek aisi fasl utarne ko hai gulistan mein

zamana dekhe ki phulon se bagh jalne lage

nigah-e-tair-e-zindan uThi thi ghar ki taraf

ki soz-e-atash-e-giryan se dagh jalne lage

ab us maqam pe hai mausamon ka sard mizaj

ki dil sulagne lage aur dimagh jalne lage

ab aa bhi ja ki yun hi dur dur rahne se

ye mere honT wo tere ayagh jalne lage

naha ke nahr se 'salim' pari wo kya nikli

ki tab-e-husn se KHud astabagh jalne lage