yun bagh koi humne ujaDta nahin dekha

yuuñ baaġh koī ham ne ujaḌtā nahīñ dekhā

muddat se kisī phuul kā chehra nahīñ dekhā

is shahr meñ shāyad koī dil vaalā nahīñ hai

jo husn kahīñ bantā sañvartā nahīñ dekhā

sayyād se gul karte rahe jaan kā saudā

maalī ne lahū kā koī dariyā nahīñ dekhā

jo sukh ke ujāle meñ thā parchhā.īñ hamārī

ab dukh ke añdhere meñ vo saayā nahīñ dekhā

idrāk kī sarhad pe ka.ī baar gayā huuñ

jo had se guzar jaatā vo lamha nahīñ dekhā

ḳhuddārī-e-insāñ ko amaañ kaise milegī

muddat se zamāne meñ masīhā nahīñ dekhā

yun bagh koi hum ne ujaDta nahin dekha

muddat se kisi phul ka chehra nahin dekha

is shahr mein shayad koi dil wala nahin hai

jo husn kahin banta sanwarta nahin dekha

sayyaad se gul karte rahe jaan ka sauda

mali ne lahu ka koi dariya nahin dekha

jo sukh ke ujale mein tha parchhain hamari

ab dukh ke andhere mein wo saya nahin dekha

idrak ki sarhad pe kai bar gaya hun

jo had se guzar jata wo lamha nahin dekha

KHuddari-e-insan ko aman kaise milegi

muddat se zamane mein masiha nahin dekha