سعادت حسن منٹو کا شمار اُردو ادب میں صف اول کے افسانہ نگاروں میں ہوتا ہے۔ کتاب "کامریڈ منٹو "منٹو کے مضامین کا انتخاب ہے ۔جسے علی احمد فاطمی نے مرتب کیا ہے۔اس کتاب میں کل پندرہ مضامین شامل کیے گئے ہیں۔ان میں سے چند مضامین تو دستیاب ہیں لیکن چند نایاب ہیں، نایاب مضامین کو مرتب نے ہندوستان کے بعض بڑے کتب خانوں سے تلاش بسیار کے بعد حاصل کیےہیں۔مرتب نے اس کے ذریعےمنٹو،ترقی پسندی اور ترقی پسندوں کے درمیان پھیلی یا پھیلائی گئی غلط فہمی کودور کرنے کی کوشش کی ہے۔اس کے علاوہ کتاب میں ایک جامعہ مقدمہ بھی شامل کیا گیا ہے۔ جس میں مرتب نے بتایا ہےکہ منٹو کے مضامین کو پڑھے بغیر مکمل اور اصل منٹو کو سمجھا ہی نہیں جا سکتا جبکہ اس کا پورا سرمایہ اشتراکی و ترقی پسند خیالات و نظریات کا مرہون منت ہے۔ بظاہر منٹو کی اذیتوں و ہجرتوں نے اس کی شکلیں بدل دی ہیں جو فطری ہے اور فکری محور بھی ایک بیدار مغز فنکار کے لئے ضروری ہوا کرتا ہے۔