زیر تبصرہ کتاب "کہانیاں پرندوں کی" ادریس احمد صدیقی کی تصنیف ہے، جس میں بچوں کے لئے پرندوں سے متعلق کہانیاں شامل کی گئی ہیں، ان کہانیوں میں مختلف پرندوں کی خصوصیات ذکر کی گئی ہیں، پرندوں کے مزاج اور عادتوں کو پیش کیا گیا ہے، اور بچوں کو اس کے ذریعے اچھی عادتوں کی طرف رغبت دلائی گئی ہے، اور بری عادتوں کی قباحت کا تذکرہ کیا گیا ہے، مثلاً پہلی کہانی "ایک تھا کوا" میں کوا اپنے کالے رنگ سے پریشان ہے، اور ہنس کی طرح سفید ہونے کی مختلف کوششیں کرتا ہے، اور خیال کرتا ہے کہ سفید رنگ کی وجہ سے لوگ مجھ سے محبت کرنے لگیں گے، لیکن ہنس اسے نصیحت کرتا ہے کہ تم اپنی زبان میٹھی کر لو۔ اس طرح کہانیوں میں بچوں کے لئے پیغامات اور نصیحتیں بخوبی موجود ہیں، پرندوں سے متعلق محاورے بخوبی استعمال کئے گئے ہیں، اور ان محاوروں کی شہرت کے اسباب بھی کہانیوں بخوبی پیش کئے گئے ہیں، جیسے 'کوا چلا ہنس کی چال اور اپنی بھی بھول گیا' وغیرہ کہانیاں مختصر اور دلچسپ ہے، زبان سادہ اور آسان ہے۔