زیر نظر کتاب کے دو اہم حصے ہیں۔ پہلے حصے کو نثر اور دوسرے کو نظم کے ساتھ مختص کیا گیا ہے۔ دراصل یہ انتخاب ان طلباء کی ذہنی ضرورتوں اور تعلیمی مقاصد کو سامنے رکھ کر کیا گیا ہے جو یونیورسٹی کی منزل پر پہلا قدم رکھتے ہیں۔ اس مرحلے پر پہنچ کر طلباء حقائق کو بے چون و چرا تسلیم کرنے کے بجائے سچائی کی تہہ تک پہنچنے کی امنگ رکھتے ہیں۔ چنانچہ ان کی ذہنیت کو مد نظر رکھتے ہوئے مشمولات کا انتخاب ان تمام امور کی روشنی میں تیار کیا گیا ہے تاکہ ان میں ادبی اور علمی نثر، نیز شعر کی مختلف صنفوں کے محاسن کی پہچان کا سلیقہ پیدا ہو اور اپنے مقتدر ادیبوں کی نگارشات کے ذریعے ان کے شعور میں ترقی، بصیرت میں گہرائی اور رویوں میں سنجیدگی پیدا ہو۔ ظاہر ہے اس مقصد کو بروئے کار لانے کے لئے پوری ادبی روایت اور نثر و نظم کے مجموعی سرمائے کی چھان بین کرکے ایک جامع انتخاب ترتیب دینے کی ضروت تھی ، لہٰذا یہ ترتیب آپ کے سامنے ہے ۔ جا بجا صفحات پر ادبی شخصیتوں کی تصاویر لذت و آگہی میں اضافہ کرتی ہیں۔