کسی بھی تخلیق کا وجود میں آنا اس کے پس منظر کو ظاہر کرتا ہے ۔ تخلیق کار جب ناول کے لیے پلاٹ تیار کر تا ہے اور کینوس کی وسعت کو جاتا ہے تو اس میں کردار کے ساتھ ساتھ بہت ساری چیزیں شامل کر تا چلا جاتا ہے ۔ مرکزی کردار سے کوئی بھی ناول آگے بڑھتا ہے اور کہانی جیسے جیسے آگے بڑھتی رہتی ہے تو اس میں کر داروں کے ساتھ واقعات کی شمولیت بھی ہوتی رہتی ہے ایسے میں ناول نگار شعوری طور پر اس کے سماج کی عکاسی کر تا ہے لیکن لاشعوری طور پر اس وقت کی سیاست سے بھی پردہ اٹھتا چلاجاتا ہے۔ شروع کے ناولوں میں دیکھیں تو اصلاحی پس منظر زیادہ ہوتاتھا جس میں سماج کی کسی ایک برائی کو پیش کیا جاتا تھا اور اصلاح بھی مقصود ہوتا تھا لیکن کہیں کہیں یہ بالکل بھی نہیں ہوتا تھا جیسے امراؤ جان ادا میں، وہاں صرف تہذیب و ثقافت ہے ۔پریم چند کے یہاں سماج کی ابتری کے ساتھ ساتھ سیاست داخل ہوتی چلی جاتی ہے اور بعد کے ناولوں میں یہ سلسلہ جاری رہتا ہے ۔ خیر اس کتاب میں مصنفہ نے تقسیم ہند کے بعد سماج میں جو کیفیت ابھر ی او ر سیاسی طور پر جو زبردست الٹ پھیر ہوا ان پر تجزیاتی نگا ہ ڈالی ہے۔ پی ایچ ڈی کے لیے لکھی گئی کتابوں کا جو پیٹرن ہوتا ہے وہی اس میں بھی ہے ۔ ناول ہے ، سماج ہے ، تاریخ ہے اور ارتقاء ۔