خلیل الرحمن اعظمی کا شمار ترقی پسندی کے برگزیدہ شاعروں میں ہوتا ہے۔زیر مطالعہ "زندگی اے زندگی" آخری شعری مجموعہ ہے۔ جو ان کے انتقال کے بعد شائع ہوا ہے۔ خلیل الرحمن اعظمی ایک جدید غزل گو شاعر ہیں۔جو ترقی پسند تحریک سے تعلق رکھتے تھے لیکن بعد میں جدیدیت سے جڑ گئے۔اس مجموعہ میں ابتدا میں چند نعت پاک ہیں۔اس کے علاوہ چالیس غزلیں، پندر ہ نظمیں، چھ کتبے او رکچھ متفرق اشعار شامل ہیں۔اس مجموعہ میں ان کہی ، نیا آدمی، پچھلے جنم کی کتھائیں،حروف و الفاظ کے ذخیرے ،میں گوتم نہیں ہوں، بھائی ،نیند پیاری نیند ، وغیرہ نظمیں شامل ہیں۔ اس مجموعہ میں اپنی بیٹی ہما کے نام لکھی گئی نظم اور لوری بھی شامل ہے۔

خلیل الرحمن اعظمی 9اگست 1927کو اعظم گڑھ کے سیدھا سلطان پور میں پیدا ہوئے ۔ان کے والد مولانا محمد شفیع جید عالم دین تھے ۔کہتے ہیں شبلی سے ان کے براہ راست مراسم تھے ۔والدہ رابعہ بیگم معمولی پڑھی لکھی تھیں ۔طالب علمی کے زمانے میں ہی خلیل  نے ایک قلمی رسالہ بیداری نکالا جس میں دوسرے طالبعلم بھی لکھتے تھے ۔اسی زمانے میں بچوں کے رسائل میں ان کی کہانیاں اور نظمیں چھپنے لگی تھیں۔وہ اپنے نام کے ساتھ مستقیمی لکھتے تھے ۔ پروفیسر رشید احمد صدیقی کی تحریروں سے متاثر ہوکر علی گڑھ تعلیم حاصل کرنے آئے ۔47کے فساد میں دہلی اور علی گڑھ کے درمیان فسادیوں نے اس ترقی پسند شاعر کو ٹرین سے پھینک دیا تھا۔کہا جاتا ہے کہ باقر مہدی ساتھ میں تھے وہ چلتی ٹرین سے کودے اور ان کو ریلیف کیمپ تک پہنچایا ۔جب خلیل  بی اے کے طالب علم تھے آتش پر ان کا مقالہ بالاقساط نگار میں شائع ہوا۔انجمن ترقی پسند مصنفین کے سکریٹری بھی ہوئے ۔رشید احمد صدیقی کی وجہ سے ان کو علی گڑھ گزٹ میں نوکری ملی ۔اپنی ادارت کے زمانے میں خلیل نے اس گزٹ کو علمی اور ادبی اخبار بنا دیا ۔1953میں علی گڑھ میں لیکچر ر ہوگئے ۔ سہیل عظیم آبادی کی پہل پر ان کی شادی راشدہ بیگم سے ہوئی ۔’’ترقی پسندتحریک‘‘ پرمقالہ لکھ کر پی ایچ ڈی کی ڈگری حاصل کی۔ یکم جون1978ء کو علی گڑھ میں انتقال کرگئے۔