شناخت: شاعر و ادیب اور فکشن نگار

علیم طاہر (شیخ علیم الدین عبدالرشید) کی پیدائش دھرن گاؤں، ضلع جلگاؤں (مہاراشٹر) میں ہوئی، جبکہ مالیگاؤں (ضلع ناسک) ان کا وطنِ ثانی اور ادبی و تخلیقی سرگرمیوں کا اہم مرکز ہے۔

ان کے والد ارشد مینانگری اردو، ہندی اور مراٹھی کے شاعراور ادیب ہیں۔ علمی و ادبی ماحول میں پرورش پانے کے باعث علیم طاہر کو کم عمری ہی میں شاعری اور ادب سے گہری دلچسپی پیدا ہوئی۔ بچپن سے ہی مشاعروں میں شرکت اور والد سے اصلاح لینے کا سلسلہ شروع ہوا، جس نے ان کے شعری شعور کو جلا بخشی۔

تعلیمی اعتبار سے انہوں نے اردو، تاریخ اور تعلیم (Education) میں ایم اے کی ڈگریاں حاصل کیں۔ اس کے علاوہ بی ایڈ، ڈی ٹی ایل اور صحافت میں ڈپلومہ کیا۔ ’’نئی اصنافِ سخن‘‘ ان کی پی ایچ ڈی کا موضوع ہے۔

علیم طاہر کی ادبی خدمات شاعری، افسانہ، ناول، تنقید، تحقیق، مضمون نگاری اور ادبِ اطفال تک پھیلی ہوئی ہیں۔ ان کی تخلیقات میں انسانی رشتوں، محبت، سماجی شعور، ہمدردی اور عصری مسائل کی بھرپور عکاسی ملتی ہے۔ وہ ادب کو انسان دوستی، مکالمے اور تہذیبی ہم آہنگی کے فروغ کا مؤثر ذریعہ تصور کرتے ہیں۔

ان کی پچاس سے زائد کتابیں شائع ہو چکی ہیں، جن میں دنیا مسافر راستے، منظر پسِ منظر، شاعری موسیقی نغمگی، عورت کچے کان کی، ایک چائے دو سگریٹ، بلیک ہول، ذہن کا منظرنامہ، علیم طاہر کے پانچ ناولٹ، علیم طاہر کے چھے ناولٹ، خوابوں کی گاڑی، صبح نکلتا وہ سورج اور خاموش چیخیں خاص طور پر قابلِ ذکر ہیں۔