"حضرت نظام الدین اولیاؒ کی حیات اور تعلیمات" پر مبنی ایک مستندتصنیف ہے ۔جس کے ابتدائی ابواب حضرت نظام الدین اولیا اور دیگر اولیائے اکرام کی تعلیمات اور حالات زندگی سے متعلق تفصیلات پر مبنی ہے۔ شیخ نظام الدین اولیاؒ سلسلہ چشتہ کے معروف صوفی بزرگ تھے جن کا سلسلہ نسب امام حسینؑ سے ملتا ہے۔آپ کااصل نام سید محمد نظام الدین ،والد کا نام سید احمد بخاری ہے۔آپ کے القابات "نظام الاولیا،محبوب الہی،سلطان المشایخ،سلطان الاولیا اور زری زربخش وغیرہ ہیں۔زیر نظر کتاب میں مصنف نے آپؒ کی ولادت، بچپن، تعلیم وتربیت اور بیعت لینے سے شیخ کے درجے پر فائز ہونے تک کی تفصیل پیش کردی ہے۔۔حضرت کی زندگی اور تعلیمات کی تفصیل میں تصوف اور اس کے مختلف درجات کا بھی ذکر ہے۔آپ ؒ نے حضرت بابا فرید الدین گنج شکر ؒسے بیعت لی۔باطنی علوم کے بعد خلافت حاصل کی۔پھر اپنے پیر و مرشد کے حکم پر دہلی میں قیام کیا،سلوک و معرفت کی تمام منزلیں طے کرنے کے باوجود آپ نے تیس سال تک نہایت ہی سخت مجاہدہ کیا۔یہی وجہ ہے کہ آپ نہ صرف شیخ کے درجے پر فائز ہوئے ،عوام و خواص میں معروف ہوئے،آ پ کے مشہور خلیفہ حضرت امیر خسرو اور حضرت نصیرالدین چراغ دہلوی ہیں۔اس کے علاوہ اس کتاب میں حضرت کی اپنے مریدوں کی دی گئی تعلیمات ،تصانیف اور حضرت کی زندگی کے آخری ماہ و سال کا بیا ن بھی موجود ہے۔