ڈاکٹر صادقہ ذکی کی زیر نظر کتاب "ممدہ مجیب حیات اور اردو خدمات" جامعہ ملیہ اسلامیہ کے ڈاکٹریٹ کے اولین مقالات میں سے ایک ہے۔جس میں مصنفہ نے نہایت محنت ،دیدہ ریزی اور ایمانداری سے مجیب صاحب کی تصانیف کا مطالعہ کیا اور غیر مطبوعہ مواد کو بھی اکٹھا کیاہے۔کتاب کے پہلے دو ابواب میں مجیب صاحب کی ابتدائی زندگی کی کڑیوں کو ملایا ہے ۔ ان کی ولادت، والدین، خاندان ،ملازمت ،ادبی زندگی وغیرہ کو بیان کیا ہے۔مصنفہ نے مجیب صاحب کے تاریخی ڈراموں ،کہانیوں، انشائیوں اور خاکوں کا بھی تجزیہ کیا ہے۔ان سبھی اصناف کی تصانیف کے تنقیدی جائزے کے لیے کتاب کو مختلف ابواب میں منقسم کیا ہے۔اس کے علاوہ مجیب صاحب کے ایسے تقریبا ڈیڑھ سو مختلف الموضوع مضامین کی نشاندہی کرتے ہوئے ان کی مکمل فہرست بھی مقالے کے آخر میں شامل کردی ہے ۔مصنفہ نے ان کے اسلوب کا بھی تجزیہ کیا ہے اور آخر میں مجیب صاحب کے مکمل ادبی خدمات کا جائزہ لیتے ہوئے بحیثیت ایک صاحب طرز ادیب اور انشا پرداز ادب میں ان کے مقام اور مرتبے کے تعین کی کوشش کی ہے۔