دیویندر ستیارتھی 28 مئی 1908 کو بھدوڑ، ضلع سنگرور، پنجاب میں پیدا ہوئے اور 95 سال کی عمر میں خالق حقیقی سے جا ملے۔ لوک گیتوں کو جمع کرنے کی خدمت جیسی انہوں نے انجام دی ، بلاشبہ برصغیر پاک و ہند کی ادبی اور تہذیبی ورثے میں اس خدمت میں کوئی اور ان کا ثانی نہیں۔ انہوں نے سنیاسی کا روپ دھار کر پاکستان ، ہندوستان ، نیپال ، سری لنکا ، برما ، بنگلہ دیش کا سفر کیا ، دس سال کے اس سفر میں وہ لاہور بھی کچھ عرصہ ٹھہرے رہے۔ لوک گیتوں پر ان کے مضامین مشہور رسالوں میں چھپتے رہے جن میں "ماڈرن ریویو" اور "ایشیا" بھی شامل ہیں۔ دیوندر ستیارتھی نے اردو میں 106 کے قریب افسانے لکھے جسے ناقدین نے پسندیدگی کا درجہ بخشا۔ تخلیقی سطح پر دیوندر ستیارتھی نے اپنے افسانوں میں افسانوی اور غیر افسانوی اصناف کی مختلف خوبیوں کو یکجا کرکے افسانوں کو ایک نئی جہت مہیا کی جس پر ان کی گرفت بھی ہوئی مگر تنقید کے باوجود وہ اپنے نئے موقف پر قائم رہے۔زیر نظر کتا ب دیوندر ستیارتھی کی سوانح حیات ہے۔ جس میں ان کی زندگی کے احوال اور ان کے فن کا جائزہ پیش کیا گیا ہے ۔ساتھ ہی ساتھ ستیارتھی کی پانچ کہانیوں کا تجزیہ بھی کیا گیا ہے۔ اس کتاب کا نام "نگری نگری پھرا مسافر"ڈاکٹر ناصر عباس نیر صاحب نے تجویز کیا تھا۔

عبدالسمیع 3 ستمبر 1984 کو رامپو راوگن مظفرپور بہار میں پیدا ہوئے۔ ابتدائی تعلیم مدرسۂ تنظیم العلوم، رامپوراوگن سے حاصل کی اور عالمیت کی سند کے لئے دارالعلوم احمدیہ سلفیہ دربھنگہ  میں داخلہ لیا، نیزجامعہ ملیہ اسلامیہ نئی دہلی سے 2007ء میں گریجویشن اور 2008ء میں  بی۔ایڈ پاس کیا ۔ اس کے بعد جواہر لعل نہرو یونیورسٹی سے ایم اے، ایم فل اور پی ایچ ڈی کی ڈگری سے حاصل کی ۔ ہندوستان کے مختلف ادبی اور سرکاری اداروں نے انہیں علمی اور ادبی خدمات کے لئے اعزازات سے نوازا ہے جن میں 2015 میں ان کی کتاب" نگری نگری پھرا مسافر" پر ساہتیہ اکادمی یوواپورسکار قابل ذکر ہے، اس کے علاوہ  دہلی اردو اکادمی نے  انہیں "اردو میں نثری نظم" کے لئے ایوارڈ سے نوازا۔ مختلف موضوع اورعنوان پر لکھی اور ترتیب دی گئی ان کی کئی کتابیں منظر عام پر آچکی ہیں جن میں دیوندر ستیارتھی سے متعلق ترتیب کردہ کتابیں بہت اہم شمار کی جاتی ہیں۔  تالیف و تصنیف کے علاوہ انہوں نے ہندی سے اردو میں دو کتابوں کے ترجمے بھی کیے ہیں ۔  ڈاکٹر عبدالسمیع بنارس ہندو یونیورسٹی کے شعبۂ اردو میں درس و تدریس کے فرائض انجام دے رہے ہیں۔