شیخ فرید الدین عطار کو دیگر علوم کی طرح فن فلسفہ سے بھی دلچسپی تھی۔ شعر وشاعری کے ساتھ ہی تصوف و معرفت میں بھی اعلیٰ رتبہ حاصل تھا ۔ زیر نظر عطار کا ایک چھوٹا سا رسالہ ’’پند نامہ‘‘ کے نام سے مشہور ہے ۔ اردو ترجمہ کے ساتھ ہی اس پر حواشی لگے ہوئے ہیں ۔ مشکل الفاظ اور توضیحات بھی پیش کی گئی ہیں ۔ یہ منظوم رسالہ اخلاق آموز نصائح پر مشتمل ہے۔ دنیا کی متعدد زبانوں میں اس کا ترجمہ ہو چکا ہے۔ اس مختصر سے کتابچے میں زندگی کا مکمل ضابطہ و دستور ہے۔ زبان کے اعتبار سے اس قدر سہل ہے کہ معمولی فارسی جاننے والا بھی اسے بآسانی سمجھ سکتا ہے ۔ پھر بھی ترجمہ کے ساتھ اسے شائع کیا جارہا ہے تاکہ افادیت زیادہ عمومی ہوسکے۔ پوری کتاب میں نصائح کا محور یہ بتانا ہے کہ کون سی خامیاں اور برائیاں انسان کو ذلیل و خوار بناتی ہیں اور کن خصوصیات کا حامل انسان باعزت و پروقار زندگی بسر کر سکتا ہے۔ شیخ عطار کی پوری زندگی تجربات کا ایک بحر ناپیدا کنار ہے ،انہیں معاشرتی طور پر گہرا تجربہ حاصل تھا کیونکہ ان کی نصیحتیں انہی تجربات و احساسات کا نچوڑ ہے جو ان کی زندگی میں پیش آئے۔

شیخ فرید الدین عطار ایران کے شہر نیشا پور میں 1145ء یا 1146ء میں پیدا ہوئے، ان کا اصل نام ابو حمید ابن ابو بکر ابراہیم تھا مگر وہ فرید الدین عطار کے نام سے ہی پہچانے گئے، وہ پیشے سے حکیم تھے ۔ بعض کا کہنا ہے کہ آپ عطروں کاروبار کرتےتھے، عطار ایک فارسی نژاد شاعر، مصنف اور صوفی بزرگ تھے۔ شہر نیشا پور میں عطار کا مطب کافی مشہور تھا، لوگ ان کے پاس ظاہری اور باطنی دونوں امراض کے لئے آیا کرتے تھے، بغداد، بصرہ، دمشق، ترکستان اور خوارزم وغیرہ تک ان کی شہرت تھی، عطار ایک اللہ والے اور بزرگوں اور صوفیوں سے خاصی محبت کا اظہار کرنے والے انسان تھے، انہوں نے اس سلسلے میں ایک عمدہ کتاب تذکرۃ الاولیا بھی مرتب کی ہے، ان کا انتقال اپریل 1221ء میں ہوا، مزار نیشاپور میں مرجع خلائق ہے۔