ساٹھ کی دہائی میں جن افسانہ نگاروں نے اپنی شناخت قائم کی ان میں اقبال مجید کا نام کافی اہم ہے۔ اقبال مجید کا تاریخی شعور کافی نکھرا ہوا ہے۔ ان کے پاس تاریخی معلومات کا خزانہ ہے جس کے سبب ان کے موضوعات میں تنوع پیدا ہو گیا ہے۔ ان کے افسانوں کی موضوعیت نئی فکر سے جلاپاتی ہے۔ اقبال مجید کے اکثر افسانوں میں حشرات الارض، جانور، پرندے وغیرہ مرکزی حیثیت رکھتے ہیں لیکن یہ سب استعاراتی، تمثیلی اور علامتی کردار ہوتے ہیں۔ زیر نظر کتاب "قصہ رنگ شکستہ" اقبال مجید کے منتخب افسانوں کا مجموعہ ہے۔ اس مجموعہ میں ان کے منتخب افسانوں کو تین ادوار میں تقسیم کر کے پیش کیا گیا ہے۔ پہلا دور میں 1960 سے 1975 تک کے دور کے افسانے شامل ہیں۔ دوسرے دور میں 1976 سے لیکر 1996 تک کے افسانے شامل ہیں۔ جبکہ تیسرے دور میں 1997 سے لیکر 1911 تک کے وہ افسانے شامل ہیں جو کسی بھی مجموعے میں شامل نہیں تھے۔