اردو ادب میں شمس الرحمن فاروقی کا شمار جدید تنقید نگاروں میں ہوتا ہے۔ انہوں نے اسلوبیات، لسانیات، صوتیات، غرض ہر اس نظریے کو پیش نظر رکھا ہے جس سے ادب کی تفہیم میں مدد مل سکتی ہے۔ مغربی ادب پر ان کی گہری نظر ہے۔ انہوں نے شعر و ادب کے مسائل پر آزادانہ غور کیا ہے۔ جدیدیت کے نظریے کو اردو ادب سے متعارف کروایا ۔ اس کے علاوہ وہ شاعر بھی ہیں، افسانہ نگار بھی ہیں اور ناول نگار بھی۔ زیر تبصرہ کتاب سوار اور دوسرے افسانے شمس الرحمن فاروقی کا افسانوی مجموعہ ہے۔ اس مجموعے میں کل پانچ افسانے شامل ہیں اور شروعات میں ان کا لکھا ہوا دیباچہ بھی ہے۔ جس میں انہوں نے اپنے افسانوی ذوق کی وضاحت کرتے ہوئے ان افسانوں کے حوالے سے چند سطریں پیش کی ہیں۔ پہلا افسانہ غالب کے حوالے سے لکھا گیا ہے جبکہ دوسرا افسانہ سوار ہے جس میں انہوں نے دہلی کو مرکزی درجہ دیا ہے مگر اس افسانہ میں میر کا ذکر بھی ہے۔افسانہ لاہور کا ایک واقعہ میں انہوں نے ایک واقعہ کو افسانے کی شکل دی ہے۔