میرے محبوب تجھے میری محبت کی قسم

میرے محبوب تجھے میری محبت کی قسم

پھر مجھے نرگسی آنکھوں کا سہارا دے دے

میرا کھویا ہوا رنگین نظارہ دے دے

میرے محبوب تجھے میری محبت کی قسم

بھول سکتیں نہیں آنکھیں وہ سہانا منظر

جب ترا حسن مرے عشق سے ٹکرایا تھا

اور پھر راہ میں بکھرے تھے ہزاروں نغمے

میں وہ نغمے تری آواز کو دے آیا تھا

ساز دل کو انہیں گیتوں کا سہارا دے دے

میرا کھویا ہوا رنگین نظارہ دے دے

میرے محبوب تجھے میری محبت کی قسم

یاد ہے مجھ کو مری عمر کی پہلی وہ گھڑی

تیری آنکھوں سے کوئی جام پیا تھا میں نے

میری رگ رگ میں کوئی برق سی لہرائی تھی

جب ترے مرمریں ہاتھوں کو چھوا تھا میں نے

آ مجھے پھر انہیں ہاتھوں کا سہارا دے دے

میرا کھویا ہوا رنگیں نظارہ دے دے

میرے محبوب تجھے میری محبت کی قسم

میں نے اک بار تری ایک جھلک دیکھی ہے

میری حسرت ہے کہ میں پھر ترا دیدار کروں

تیرے سائے کو سمجھ کر میں حسیں تاج محل

چاندنی رات میں نظروں سے تجھے پیار کروں

اپنی مہکی ہوئی زلفوں کا سہارا دے دے

میرا کھویا ہوا رنگین نظارہ دے دے

میرے محبوب تجھے میری محبت کی قسم

ڈھونڈتا ہوں تجھے ہر راہ میں ہر محفل میں

تھک گئے ہیں مرے مجبور تمنا کے قدم

آج کا دن مری امید کا ہے آخری دن

کل نہ جانے میں کہاں اور کہاں تو ہو صنم

دو گھڑی اپنی نگاہوں کا سہارا دے دے

میرا کھویا ہوا رنگین نظارہ دے دے

میرے محبوب تجھے میری محبت کی قسم

سامنے آ کے ذرا پردہ اٹھا دے رخ سے

اک یہی میرا علاج غم تنہائی ہے

تیری فرقت نے پریشان کیا ہے مجھ کو

اب تو مل جا کہ مری جان پہ بن آئی ہے

دل کو بھولی ہوئی یادوں کا سہارا دے دے

میرا کھویا ہوا رنگین نظارہ دے دے

میرے محبوب تجھے میری محبت کی قسم