wo gada-garan-e-jalwa sar-e-rahguzar chup the

vo gadā-garān-e-jalva sar-e-rahguzār chup the

jinheñ tujh se thiiñ umīdeñ vo umīd-vār chup the

vo qatār-e-gumrahāñ thī liye mish.aleñ ravāñ thī

vo jo manzil-āshnā the vo pas-e-ġhubār chup the

ye ajiib sāneha thā jise chashm-e-gul ne dekhā

ki tuyūr-e-dām-dīda sar-e-shāḳh-sār chup the

kise jur.at-e-tasallī ki vo baat hī thī aisī

shab-e-intizār chup thī mire ġham-gusār chup the

hameñ kam milīñ sazā.eñ ki ziyāda thiiñ ḳhatā.eñ

tire sahv kyā ginā.eñ tire sharmsār chup the

ye dil-o-nazar figārāñ yahī thī vo vaz.a-dārāñ

pas-e-kū-e-yār giryāñ sar-e-kū-e-yār chup the

huī ham pe sañg-bārī magar apnī vaz.a-dārī

ki thī 'shāz' jin se yaarī vahī apne yaar chup the

wo gada-garan-e-jalwa sar-e-rahguzar chup the

jinhen tujh se thin umiden wo umid-war chup the

wo qatar-e-gumrahan thi liye mishalen rawan thi

wo jo manzil-ashna the wo pas-e-ghubar chup the

ye ajib saneha tha jise chashm-e-gul ne dekha

ki tuyur-e-dam-dida sar-e-shaKH-sar chup the

kise jurat-e-tasalli ki wo baat hi thi aisi

shab-e-intizar chup thi mere gham-gusar chup the

hamein kam milin sazaen ki ziyaada thin KHataen

tere sahw kya ginaen tere sharmsar chup the

ye dil-o-nazar figaran yahi thi wo waza-daran

pas-e-ku-e-yar giryan sar-e-ku-e-yar chup the

hui hum pe sang-bari magar apni waza-dari

ki thi 'shaz' jin se yari wahi apne yar chup the