aa gaya wasl mein un ko jo pasina ThanDa

aa gayā vasl meñ un ko jo pasīnā ThanDā

mujh se bole ki huā ab to kalejā ThanDā

sho.ala-e-dāġh ko aahoñ se baḌhā dete haiñ

sūrat-e-sham.a vo karte haiñ kalejā ThanDā

maiñ jo rotā huuñ to hañs hañs ke ye farmāte haiñ

terī aahoñ ne kiyā merā kalejā ThanDā

ḳhuun mujh par na ho parvāne jale jaate haiñ

kar charāġh-e-sar-e-marqad ko ḳhudāyā ThanDā

band bulbul kī huiiñ kunj-e-qafas meñ āñkheñ

sehn-e-gulshan se jo aaya koī jhoñkā ThanDā

sard naale jo kiye furqat-e-gul meñ shab ko

āh-e-bulbul se huā baaġh kā rastā ThanDā

sard aaheñ jo bharīñ baiTh ke sāhil pe kabhī

aur bhī ho gayā dariyā kā kinārā ThanDā

sham.a-rū garmiyāñ kyūñkar na kareñ mahfil meñ

dil jaleñ aur ke un kā ho kalejā ThanDā

aag dil meñ hai qayāmat kī lagī ai jarrāh

ātishīñ daaġh pe rakh de koī phāhā ThanDā

vasl be-hijr ke hotā nahīñ 'fāḳhir' ko nasīb

dil jalāte haiñ to karte haiñ kalejā ThanDā

aa gaya wasl mein un ko jo pasina ThanDa

mujh se bole ki hua ab to kaleja ThanDa

shoala-e-dagh ko aahon se baDha dete hain

surat-e-shama wo karte hain kaleja ThanDa

main jo rota hun to hans hans ke ye farmate hain

teri aahon ne kiya mera kaleja ThanDa

KHun mujh par na ho parwane jale jate hain

kar charagh-e-sar-e-marqad ko KHudaya ThanDa

band bulbul ki huin kunj-e-qafas mein aankhen

sehn-e-gulshan se jo aaya koi jhonka ThanDa

sard nale jo kiye furqat-e-gul mein shab ko

aah-e-bulbul se hua bagh ka rasta ThanDa

sard aahen jo bharin baiTh ke sahil pe kabhi

aur bhi ho gaya dariya ka kinara ThanDa

shama-ru garmiyan kyunkar na karen mahfil mein

dil jalen aur ke un ka ho kaleja ThanDa

aag dil mein hai qayamat ki lagi ai jarrah

aatishin dagh pe rakh de koi phaha ThanDa

wasl be-hijr ke hota nahin 'faKHir' ko nasib

dil jalate hain to karte hain kaleja ThanDa