aabla-pai ka nasha na gaya

ābla-pā.ī kā nasha na gayā

ham se sab kī tarah chalā na gayā

ġham to ye hai tirī sadā par bhī

maiñ kabhī dauḌtā huā na gayā

tum ne āzād kar diyā jis ko

us parinde se phir uḌā na gayā

ashk dete rahe ḳhatoñ kā javāb

nāma-bar se magar likhā na gayā

vo jo ḳhāmoshiyoñ ne likkhā thā

vo fasāna kabhī kahā na gayā

ik farishta bulā rahā thā mujhe

terī dahlīz se uThā na gayā

rasm vo bhī hamīñ ne puurī kī

tum se barbād bhī kiyā na gayā

aabla-pai ka nasha na gaya

hum se sab ki tarah chala na gaya

gham to ye hai teri sada par bhi

main kabhi dauDta hua na gaya

tum ne aazad kar diya jis ko

us parinde se phir uDa na gaya

ashk dete rahe KHaton ka jawab

nama-bar se magar likha na gaya

wo jo KHamoshiyon ne likkha tha

wo fasana kabhi kaha na gaya

ek farishta bula raha tha mujhe

teri dahliz se uTha na gaya

rasm wo bhi hamin ne puri ki

tum se barbaad bhi kiya na gaya