aadha jiwan dard mein kaTa aadha KHak uDane mein

aadhā jīvan dard meñ kaaTā aadhā ḳhaak uḌāne meñ

kahne ko ye aur safar thā 'umr lagī samjhāne meñ

kuchh to kachchī niiñd meñ dekhe aur kuchh jāgtī āñkhoñ se

ḳhvāboñ kī zanjīr na TuuTī niiñd ke aane jaane meñ

shaam Dhale to vyākul man kā añdhiyārā baḌh jaatā hai

aas kī baatī bujh jaatī hai dil kī jot jalāne meñ

dariyā kī tuġhyānī dekhī aur tūfān ke rele bhī

mujh ko saarī 'umr lagī hai nayyā paar lagāne meñ

apnī zaat ke dukh meñ zinda kitne hī insān yahāñ

lamha lamha chehre badle ik kirdār nibhāne meñ

kuchh ḳhushiyoñ kī ḳhātir ham ne dukh ke dariyā paar kiye

aañkh se aañsū bah nikle bas ek zarā muskāne meñ

dhuñdlī paḌ ga.ī aañkh kī putlī ḳhuun ragoñ se bah niklā

rang hue haiñ saare dhuñdle ik tasvīr banāne meñ

sachchā.ī aur nekī kyā hai 'adl hai kyā insāf hai kyā

ham ne saare miit gañvā.e ik ye baat batāne meñ

dekh 'ġhazal' terā ye lahja logoñ ko manzūr nahīñ

dār-o-rasan terī qismat hai sach kā saath nibhāne meñ

aadha jiwan dard mein kaTa aadha KHak uDane mein

kahne ko ye aur safar tha 'umr lagi samjhane mein

kuchh to kachchi nind mein dekhe aur kuchh jagti aankhon se

KHwabon ki zanjir na TuTi nind ke aane jaane mein

sham Dhale to wyakul man ka andhiyara baDh jata hai

aas ki baati bujh jati hai dil ki jot jalane mein

dariya ki tughyani dekhi aur tufan ke rele bhi

mujh ko sari 'umr lagi hai nayya par lagane mein

apni zat ke dukh mein zinda kitne hi insan yahan

lamha lamha chehre badle ek kirdar nibhane mein

kuchh KHushiyon ki KHatir hum ne dukh ke dariya par kiye

aankh se aansu bah nikle bas ek zara muskane mein

dhundli paD gai aankh ki putli KHun ragon se bah nikla

rang hue hain sare dhundle ek taswir banane mein

sachchai aur neki kya hai 'adl hai kya insaf hai kya

hum ne sare mit ganwae ek ye baat batane mein

dekh 'ghazal' tera ye lahja logon ko manzur nahin

dar-o-rasan teri qismat hai sach ka sath nibhane mein