آدھا جیون درد میں کاٹا آدھا خاک اڑانے میں

آدھا جیون درد میں کاٹا آدھا خاک اڑانے میں

کہنے کو یہ اور سفر تھا عمر لگی سمجھانے میں

کچھ تو کچی نیند میں دیکھے اور کچھ جاگتی آنکھوں سے

خوابوں کی زنجیر نہ ٹوٹی نیند کے آنے جانے میں

شام ڈھلے تو ویاکل من کا اندھیارا بڑھ جاتا ہے

آس کی باتی بجھ جاتی ہے دل کی جوت جلانے میں

دریا کی طغیانی دیکھی اور طوفان کے ریلے بھی

مجھ کو ساری عمر لگی ہے نیا پار لگانے میں

اپنی ذات کے دکھ میں زندہ کتنے ہی انسان یہاں

لمحہ لمحہ چہرے بدلے اک کردار نبھانے میں

کچھ خوشیوں کی خاطر ہم نے دکھ کے دریا پار کئے

آنکھ سے آنسو بہہ نکلے بس ایک ذرا مسکانے میں

دھندلی پڑ گئی آنکھ کی پتلی خون رگوں سے بہہ نکلا

رنگ ہوئے ہیں سارے دھندلے اک تصویر بنانے میں

سچائی اور نیکی کیا ہے عدل ہے کیا انصاف ہے کیا

ہم نے سارے میت گنوائے اک یہ بات بتانے میں

دیکھ غزلؔ تیرا یہ لہجہ لوگوں کو منظور نہیں

دار و رسن تیری قسمت ہے سچ کا ساتھ نبھانے میں