aae kya tera tasawwur dhyan mein

aa.e kyā terā tasavvur dhyān meñ

kuchh se kuchh hai aan hī kī aan meñ

yaañ ishārāt-e-ġhalat par zindagī

vaañ adā hai aur hī sāmān meñ

teġh-e-qātil hai rag-e-gardan mirī

āb-e-paikāñ dam tan-e-be-jān meñ

yā to qātil ho gayā rahm-āshnā

yā paḌe hoñge kahīñ maidān meñ

ashk apne phir phirā kar har taraf

aa.e āḳhir tere hī dāmān meñ

haa.e kaise kaise vārasta-mizāj

sar-nigūñ dam band haiñ zindān meñ

ka.aba āñkhoñ meñ samātā hī nahīñ

kyā butoñ ne kah diyā kuchh kaan meñ

aañkh ke uThte hī uThte kuchh na thā

ham chale armān hī armān meñ

dair-o-ka.aba par nahīñ mauqūf kuchh

aur hī kuchh shaan hai har shaan meñ

girya-e-sad-sirrī aur ham kam-hausla

kashtī apnī aa ga.ī tūfān meñ

jannat o dozaḳh se kyā ummīd-o-bīm

hasrateñ sī hasrateñ haiñ jaan meñ

ḳhud-parastī aur islām-āfrīñ

ka.aba-e-āshiq hai kufristān meñ

ai 'qalaq' kal tak gadā-e-dair the

aaj da.ave ho ga.e īmān meñ

aae kya tera tasawwur dhyan mein

kuchh se kuchh hai aan hi ki aan mein

yan ishaaraat-e-ghalat par zindagi

wan ada hai aur hi saman mein

tegh-e-qatil hai rag-e-gardan meri

aab-e-paikan dam tan-e-be-jaan mein

ya to qatil ho gaya rahm-ashna

ya paDe honge kahin maidan mein

ashk apne phir phira kar har taraf

aae aaKHir tere hi daman mein

hae kaise kaise warasta-mizaj

sar-nigun dam band hain zindan mein

kaba aankhon mein samata hi nahin

kya buton ne kah diya kuchh kan mein

aankh ke uThte hi uThte kuchh na tha

hum chale arman hi arman mein

dair-o-kaba par nahin mauquf kuchh

aur hi kuchh shan hai har shan mein

girya-e-sad-sirri aur hum kam-hausla

kashti apni aa gai tufan mein

jannat o dozaKH se kya ummid-o-bim

hasraten si hasraten hain jaan mein

KHud-parasti aur islam-afrin

kaba-e-ashiq hai kufristan mein

ai 'qalaq' kal tak gada-e-dair the

aaj dawe ho gae iman mein