aae the tere shahr mein kitni lagan se hum

aa.e the tere shahr meñ kitnī lagan se ham

mansūb ho sake na tirī anjuman se ham

bezār aa na jaa.eñ ġham-e-jān-o-tan se ham

apne vatan meñ rah ke bhī haiñ be-vatan se ham

yuuñ be-ruḳhī se pesh na aa ahl-e-dil ke saath

uTh kar chale na jaa.eñ tirī anjuman se ham

ye sar-kashī junūñ nahīñ pindār-e-ishq hai

guzre haiñ daar se bhī usī bāñkpan se ham

mehr-o-mah-o-nujūm kī mānind roz-o-shab

har jaur-e-āsmāñ pe rahe ḳhanda-zan se ham

milte haiñ roz dast-e-sabā se payām-e-gul

zindāñ meñ bhī qarīb haiñ ahl-e-chaman se ham

'shā.ir' adab ke mohtasiboñ ko ḳhabar nahīñ

kyā kaam le rahe haiñ taġhazzul ke fan se ham

aae the tere shahr mein kitni lagan se hum

mansub ho sake na teri anjuman se hum

bezar aa na jaen gham-e-jaan-o-tan se hum

apne watan mein rah ke bhi hain be-watan se hum

yun be-ruKHi se pesh na aa ahl-e-dil ke sath

uTh kar chale na jaen teri anjuman se hum

ye sar-kashi junun nahin pindar-e-ishq hai

guzre hain dar se bhi usi bankpan se hum

mehr-o-mah-o-nujum ki manind roz-o-shab

har jaur-e-asman pe rahe KHanda-zan se hum

milte hain roz dast-e-saba se payam-e-gul

zindan mein bhi qarib hain ahl-e-chaman se hum

'shair' adab ke mohtasibon ko KHabar nahin

kya kaam le rahe hain taghazzul ke fan se hum