aag bhaDki kahan thi kidhar lag gai

aag bhaḌkī kahāñ thī kidhar lag ga.ī

thī ḳhatā kis kī aur kis ke sar lag ga.ī

dil dhaḌakne lagā muskurāte hue

merī ḳhushiyoñ ko kis kī nazar lag ga.ī

is chaman ke muqaddar meñ hī aag hai

aaj idhar lag ga.ī kal udhar lag ga.ī

baat to aap ke aur mire biich thī

phir zamāne ko kaise ḳhabar lag ga.ī

aap ab jo bhī chāheñ vo unvān deñ

merī tasvīr dīvār par lag ga.ī

mere dāman pe chashm-e-karam ai ḳhudā

maiñ musāfir thā gard-e-safar lag ga.ī

aag to aag hai aag kī baat kyā

laakh dāman bachāyā magar lag ga.ī

jeb-o-dāman se mahrūm ho jāoge

choT agar mere ehsās par lag ga.ī

ai 'azīz' un ko ehsās hotā nahīñ

aur mirī zindagī daao par lag ga.ī

aag bhaDki kahan thi kidhar lag gai

thi KHata kis ki aur kis ke sar lag gai

dil dhaDakne laga muskuraate hue

meri KHushiyon ko kis ki nazar lag gai

is chaman ke muqaddar mein hi aag hai

aaj idhar lag gai kal udhar lag gai

baat to aap ke aur mere bich thi

phir zamane ko kaise KHabar lag gai

aap ab jo bhi chahen wo unwan den

meri taswir diwar par lag gai

mere daman pe chashm-e-karam ai KHuda

main musafir tha gard-e-safar lag gai

aag to aag hai aag ki baat kya

lakh daman bachaya magar lag gai

jeb-o-daman se mahrum ho jaoge

choT agar mere ehsas par lag gai

ai 'aziz' un ko ehsas hota nahin

aur meri zindagi dao par lag gai