aag zaKHmon ki jala kar dekho

aag zaḳhmoñ kī jalā kar dekho

jī ko ik rog lagā kar dekho

kitnī ma.asūm hai rūdād-e-hayāt

ḳhud ko aaseb banā kar dekho

shikva-e-nīm-nigāhī hai ġhalat

phir to chehra hī milā kar dekho

kyā kaheñ lafz-e-mohabbat hai garāñ

dil ke aurāq uThā kar dekho

kitne chehre haiñ naqāb-ālūda

lau charāġhoñ kī baḌhā kar dekho

apnī bichhḌī huī tanhā.ī se

kyuuñ na ik baar vafā kar dekho

bahtī maujoñ ko qarār aa jaa.e

naġhma-e-dard sunā kar dekho

kitne shaffāf haiñ yādoñ ke badan

tum inheñ haath lagā kar dekho

dil kī jannat ko sukūñ kuchh to mile

dasht-o-sahrā hī basā kar dekho

bistar-e-gul pe bahut raat ga.e

koī sotā hai jagā kar dekho

un makānoñ meñ makīñ koī nahīñ

vaise zanjīr hilā kar dekho

naam apnā bhī kahīñ hai ki nahīñ

merā dīvān uThā kar dekho

aag zaKHmon ki jala kar dekho

ji ko ek rog laga kar dekho

kitni masum hai rudad-e-hayat

KHud ko aaseb bana kar dekho

shikwa-e-nim-nigahi hai ghalat

phir to chehra hi mila kar dekho

kya kahen lafz-e-mohabbat hai garan

dil ke auraq uTha kar dekho

kitne chehre hain naqab-aluda

lau charaghon ki baDha kar dekho

apni bichhDi hui tanhai se

kyun na ek bar wafa kar dekho

bahti maujon ko qarar aa jae

naghma-e-dard suna kar dekho

kitne shaffaf hain yaadon ke badan

tum inhen hath laga kar dekho

dil ki jannat ko sukun kuchh to mile

dasht-o-sahra hi basa kar dekho

bistar-e-gul pe bahut raat gae

koi sota hai jaga kar dekho

un makanon mein makin koi nahin

waise zanjir hila kar dekho

nam apna bhi kahin hai ki nahin

mera diwan uTha kar dekho