آغاز محبت ہی میں ناشاد کرو گے

آغاز محبت ہی میں ناشاد کرو گے

کیا مجھ کو خبر تھی مجھے برباد کرو گے

مدت سے ہے ویران مرا گلشن ہستی

کب پھول کوئی ہونٹوں سے ارشاد کرو گے

ہے وقت کی آغوش میں اک ایسا زمانہ

جب راتوں کو اٹھ اٹھ کے مجھے یاد کرو گے

خوابوں کے دریچوں سے مجھے جھانکنے والو

کب اجڑی ہوئی خلوتیں آباد کرو گے

انسان کو بے کار سی شے جاننے والو

سایوں سے لپٹ کر کبھی فریاد کرو گے

کم ظرف محبت بھی ہیں بیداد کے طالب

کیا اور بھی ارزانیٔ بیداد کرو گے

یہ ذکر ہے الطافؔ عناصر سے شب و روز

کب قیدئ انفاس کو آزاد کرو گے