aah kab lab par nahin hai dagh kab dil mein nahin

aah kab lab par nahīñ hai daaġh kab dil meñ nahīñ

kaun sī shab hai ki garmī apnī mahfil meñ nahīñ

bazm kī kasrat se andesha mire dil meñ nahīñ

dil meñ us kī hai jagah mere jo mahfil meñ nahīñ

panja-e-mizhgān-e-tar ne ye uḌā.īñ dhajjiyāñ

taar baaqī ek bhī dāmān-e-sāhil meñ nahīñ

ḳhūn-e-nāhaq kā hamāre daaġh miTne kā nahīñ

teġh meñ hogā agar dāmān-e-qātil meñ nahīñ

parda-dār chehra-e-yūsuf nahīñ hai har naqāb

husn-e-lailā jalva-gar har ek mahfil meñ nahīñ

najd kā sahrā ajab sahrā-e-vahshat-ḳhez hai

qais kyā lailā ko bhī ārām manzil meñ nahīñ

jis taraf jī chāhegā merā nikal jā.ūñgā maiñ

saikaḌoñ darvāze haiñ halqe salāsil meñ nahīñ

had se bāhar paañv jo rakhtā hai hotā hai ḳharāb

ghar meñ jo rāhat musāfir ko hai manzil meñ nahīñ

Dūbte jaate haiñ kyūñkar log hairat hai mujhe

qadd-e-ādam aab bahr-e-teġh-e-qātil meñ nahīñ

ho gayā dahshat se aisā bismiloñ kā ḳhuun ḳhushk

ek bhī dhabbā lahū kā teġh-e-qātil meñ nahīñ

aah kab lab par nahin hai dagh kab dil mein nahin

kaun si shab hai ki garmi apni mahfil mein nahin

bazm ki kasrat se andesha mere dil mein nahin

dil mein us ki hai jagah mere jo mahfil mein nahin

panja-e-mizhgan-e-tar ne ye uDain dhajjiyan

tar baqi ek bhi daman-e-sahil mein nahin

KHun-e-nahaq ka hamare dagh miTne ka nahin

tegh mein hoga agar daman-e-qatil mein nahin

parda-dar chehra-e-yusuf nahin hai har naqab

husn-e-laila jalwa-gar har ek mahfil mein nahin

najd ka sahra ajab sahra-e-wahshat-KHez hai

qais kya laila ko bhi aaram manzil mein nahin

jis taraf ji chahega mera nikal jaunga main

saikaDon darwaze hain halqe salasil mein nahin

had se bahar panw jo rakhta hai hota hai KHarab

ghar mein jo rahat musafir ko hai manzil mein nahin

Dubte jate hain kyunkar log hairat hai mujhe

qadd-e-adam aab bahr-e-tegh-e-qatil mein nahin

ho gaya dahshat se aisa bismilon ka KHun KHushk

ek bhi dhabba lahu ka tegh-e-qatil mein nahin