aai hai us but-e-kafir pe tabiat apni

aa.ī hai us but-e-kāfir pe tabī.at apnī

baḳht apne haiñ nasīb apne haiñ qismat apnī

ik zamāna thā ki har roz chale aate the

ab to muddat se dikhāte nahīñ sūrat apnī

kis bharose pe tū maġhrūr hai mun.im itnā

jaan apnī hai na daulat na hukūmat apnī

maiñ balā-nosh huuñ saaqī mujhe de bhar ke subū

ek sāġhar se nahīñ bhartī hai niyyat apnī

va.ada-e-vasl qayāmat hī ko puurā hogā

intizār is kā nahīñ ye hai qayāmat apnī

itr se baḌh ke mo.attar hai ye zulfoñ kā ḳhayāl

jis kī ḳhushbū se mahak jā.eñgī turbat apnī

ham bhī be-misl haiñ rakhte nahīñ duniyā meñ misāl

kisī sūrat se nahīñ miltī hai sūrat apnī

jab guzar gor-e-ġharībāñ pe ho tham kar chaliye

hashr se pahle na ho jaa.e qayāmat apnī

jab ki tere hī sivā mūnis-o-ġham-ḳhvār nahīñ

phir na kyoñ arz kareñ tujh hī se hālat apnī

piir kā hai ye tasadduq ki huuñ mash.hūr-e-jahāñ

ishq-e-mahbūb-e-ḳhudā se huī shohrat apnī

mujh sā tū bhī to hai ik banda-e-ājiz mun.im

kyoñ dikhātā hai hameñ shaukat-o-hashmat apnī

yuuñ hī hasrat meñ nikal jā.eñgī kyā jān-e-hazīñ

yā-ilāhī kabhī laḌ jā.eñgī qismat apnī

aa.ina ko huī hairat mirī ḳhud-bīnī se

miltī-jultī kisī sūrat se hai sūrat apnī

sar mirā bār-e-garāñ hai tan-e-be-jāñ pe mire

teġh-e-qātil se nikal jā.eñgī kulfat apnī

mujh ko badnām kiyā girya-o-zārī ne mirī

aabrū hī na rahī aur na hai izzat apnī

baa'd marne ke bhī aa.egā nahīñ chain mujhe

toḌ kar saaf nikal jā.ūñgā turbat apnī

duur se kartā huuñ zāhid tirī chāhat ko salām

terī sohbat se bigaḌ jā.eñgī aadat apnī

bāda-ḳhvārī se 'qamar' ḳhalq meñ badnām huā

ronā aatā hai mujhe dekh ke hālat apnī

aai hai us but-e-kafir pe tabiat apni

baKHt apne hain nasib apne hain qismat apni

ek zamana tha ki har roz chale aate the

ab to muddat se dikhate nahin surat apni

kis bharose pe tu maghrur hai munim itna

jaan apni hai na daulat na hukumat apni

main bala-nosh hun saqi mujhe de bhar ke subu

ek saghar se nahin bharti hai niyyat apni

wada-e-wasl qayamat hi ko pura hoga

intizar is ka nahin ye hai qayamat apni

itr se baDh ke moattar hai ye zulfon ka KHayal

jis ki KHushbu se mahak jaengi turbat apni

hum bhi be-misl hain rakhte nahin duniya mein misal

kisi surat se nahin milti hai surat apni

jab guzar gor-e-ghariban pe ho tham kar chaliye

hashr se pahle na ho jae qayamat apni

jab ki tere hi siwa munis-o-gham-KHwar nahin

phir na kyon arz karen tujh hi se haalat apni

pir ka hai ye tasadduq ki hun mashhur-e-jahan

ishq-e-mahbub-e-KHuda se hui shohrat apni

mujh sa tu bhi to hai ek banda-e-ajiz munim

kyon dikhata hai hamein shaukat-o-hashmat apni

yun hi hasrat mein nikal jaengi kya jaan-e-hazin

ya-ilahi kabhi laD jaengi qismat apni

aaina ko hui hairat meri KHud-bini se

milti-julti kisi surat se hai surat apni

sar mera bar-e-garan hai tan-e-be-jaan pe mere

tegh-e-qatil se nikal jaengi kulfat apni

mujh ko badnam kiya girya-o-zari ne meri

aabru hi na rahi aur na hai izzat apni

ba'd marne ke bhi aaega nahin chain mujhe

toD kar saf nikal jaunga turbat apni

dur se karta hun zahid teri chahat ko salam

teri sohbat se bigaD jaengi aadat apni

baada-KHwari se 'qamar' KHalq mein badnam hua

rona aata hai mujhe dekh ke haalat apni