aai qarib sham to aisa laga charagh

aa.ī qarīb shaam to aisā lagā charāġh

apnī hī raushnī se nahīñ āshnā charāġh

sakte meñ log aa ga.e raushan huā ḳhayāl

jaise sabhī ke vāste manzar huā charāġh

alfāz un ke dene lage raushnī tamām

tārīf meñ charāġh kī jab bhī kahā charāġh

māthe pe thā pasīna badan bhī thā chūr-chūr

thā gesūoñ meñ raat kī uljhā huā charāġh

thā us ke tevaroñ meñ junūñ inqalāb kā

jo āñdhiyoñ ke taaq meñ jaltā rahā charāġh

vahshat ke dā.ere meñ ka.ī zindagī tamām

jugnū kī zindagī ko maiñ likhtā rahā charāġh

ai 'aks' khiḌkiyoñ ko khulā chhoḌ de zarā

kamre ke band gheroñ se ghabrā gayā charāġh

aai qarib sham to aisa laga charagh

apni hi raushni se nahin aashna charagh

sakte mein log aa gae raushan hua KHayal

jaise sabhi ke waste manzar hua charagh

alfaz un ke dene lage raushni tamam

tarif mein charagh ki jab bhi kaha charagh

mathe pe tha pasina badan bhi tha chur-chur

tha gesuon mein raat ki uljha hua charagh

tha us ke tewaron mein junun inqalab ka

jo aandhiyon ke taq mein jalta raha charagh

wahshat ke daere mein kai zindagi tamam

jugnu ki zindagi ko main likhta raha charagh

ai 'aks' khiDkiyon ko khula chhoD de zara

kamre ke band gheron se ghabra gaya charagh