آج آنکھوں میں جو خماری ہے

آج آنکھوں میں جو خماری ہے

ان کے خوابوں میں شب گزاری ہے

کون لایا ہے ہوش میں مجھ کو

کس نظر نے نظر اتاری ہے

ہجر دیکھا ہے وصل دیکھا ہے

دونوں جانب ہی بے قراری ہے

پھر کتابوں کے پھول مہکے ہیں

پھر تری یاد دل پہ طاری ہے

دل کے ٹکڑے ہوئے ہیں سینہ میں

جان جاں چوٹ یہ کراری ہے

جس کو جان غزل بتاتے ہو

وہ غزل تو میاں ہماری ہے

ہم نے کاٹی ہے عمر ان کے بغیر

کون کہتا ہے کہ گزاری ہے

ہم وفادار ملک ہیں غافلؔ

بس یہی داستاں ہماری ہے