aaj se pahle na yun ruswa sar-e-bazar tha

aaj se pahle na yuuñ rusvā sar-e-bāzār thā

hai yahī vo aadmī jo sāhib-e-kirdār thā

chār-sū dām-e-havas thā aur dil ḳhud.dār thā

vo kashākash thī ki jiinā hī mirā dushvār thā

ḳhaak meñ ġhaltāñ usī kā turra-e-dastār thā

‘azmat-e-ajdād kā jo hāshiya-bardār thā

sar-bulandī kā zamāne meñ vahī haqdār thā

nām-e-haq par jis ke hisse meñ farāz-e-dār thā

thī ḳhazaf-rezoñ kī dūkāñ aur khulā bāzār thā

koī gāhak hī nahīñ terā dur-e-shahvār thā

jis jagah dekhā savā neze pe ham ne āftāb

'arsa-e-mahshar na thā vo kūcha-e-dildār thā

josh-e-girya meñ bhī rakkhā tere dāman kā lihāz

kis qadar muhtāt merā dīda-e-ḳhūñbār thā

tum se ahl-e-zar kī shān-e-kaj-kulāhī kyā kaheñ

jo bhī dāḳhil saf meñ thā mast-e-mai-e-pindār thā

zaḳhm-e-pā ko dekhte kyā is kī fursat hī na thī

jabki sahrā-e-junūñ meñ tishna-lab har ḳhaar thā

sāqī-e-mahvash kī āñkhoñ kā asar to dekhiye

jaam abhī aaya na thā aur bāda-kash sarshār thā

kis tarah karte mudāvā-e-ġham-e-jānāñ bhī ham

dil hī jab apnā harīs-e-lazzat-e-āzār thā

Daal dī phir bhī binā-e-āshiyāñ 'bahzād' ne

garche har zarra chaman kā darpai-e-āzār thā

aaj se pahle na yun ruswa sar-e-bazar tha

hai yahi wo aadmi jo sahib-e-kirdar tha

chaar-su dam-e-hawas tha aur dil KHuddar tha

wo kashakash thi ki jina hi mera dushwar tha

KHak mein ghaltan usi ka turra-e-dastar tha

‘azmat-e-ajdad ka jo hashiya-bardar tha

sar-bulandi ka zamane mein wahi haqdar tha

nam-e-haq par jis ke hisse mein faraaz-e-dar tha

thi KHazaf-rezon ki dukan aur khula bazar tha

koi gahak hi nahin tera dur-e-shahwar tha

jis jagah dekha sawa neze pe hum ne aaftab

'arsa-e-mahshar na tha wo kucha-e-dildar tha

josh-e-girya mein bhi rakkha tere daman ka lihaz

kis qadar muhtat mera dida-e-KHunbar tha

tum se ahl-e-zar ki shan-e-kaj-kulahi kya kahen

jo bhi daKHil saf mein tha mast-e-mai-e-pindar tha

zaKHm-e-pa ko dekhte kya is ki fursat hi na thi

jabki sahra-e-junun mein tishna-lab har KHar tha

saqi-e-mahwash ki aankhon ka asar to dekhiye

jam abhi aaya na tha aur baada-kash sarshaar tha

kis tarah karte mudawa-e-gham-e-jaanan bhi hum

dil hi jab apna haris-e-lazzat-e-azar tha

Dal di phir bhi bina-e-ashiyan 'bahzad' ne

garche har zarra chaman ka darpai-e-azar tha