aaj to ghar mein koi nahin hai aaj to khul ke ro lenge

aaj to ghar meñ koī nahīñ hai aaj to khul ke ro leñge

ro ro kar thak jā.eñge to pal do pal ko so leñge

kab tak ham mash.hūr raheñge nek-atvār-o-nek-ḳhisāl

kab tak ye dīvār-o-dar bhī āḳhir bhed na kholeñge

har dīvār girā deñge gar apnī jaan meñ jaan rahī

haath aur pair salāmat haiñ to saare patthar Dho leñge

khetoñ se bādal tak ik barsāt kā fāsla haa.il hai

yā'nī jab tak fasl kaTegī ham to būḌhe ho leñge

rūkhī-sūkhī khā lete haiñ is ummīd ke saath 'jamāl'

bārish ho jaa.e to ham bhī apnī roTī bhigo leñge

aaj to ghar mein koi nahin hai aaj to khul ke ro lenge

ro ro kar thak jaenge to pal do pal ko so lenge

kab tak hum mashhur rahenge nek-atwar-o-nek-KHisal

kab tak ye diwar-o-dar bhi aaKHir bhed na kholenge

har diwar gira denge gar apni jaan mein jaan rahi

hath aur pair salamat hain to sare patthar Dho lenge

kheton se baadal tak ek barsat ka fasla hail hai

ya'ni jab tak fasl kaTegi hum to buDhe ho lenge

rukhi-sukhi kha lete hain is ummid ke sath 'jamal'

barish ho jae to hum bhi apni roTi bhigo lenge