aaKHir na chali koi bhi tadbir hamari

āḳhir na chalī koī bhī tadbīr hamārī

ban ban ke bigaḌne lagī taqdīr hamārī

ye ishq ke hāthoñ huī tauqīr hamārī

bāzāroñ meñ bikne lagī tasvīr hamārī

is tarah ke din raat dikhātī hai karishme

taqdīr pas-e-parda-e-tadbīr hamārī

jaldī na karo dhaar hai ḳhanjar pe abhī to

ho lene do sābit koī taqsīr hamārī

kuchh ḳhuun kī chhīñTeñ kahīñ ashkoñ kī namī hai

jaatī hai ajab shaan se tahrīr hamārī

har samt dahak uThtī hai ik aag jahāñ meñ

lo detī hai jab raat ko zanjīr hamārī

bas Daal lo chehre pe naqāb apne ḳhudārā

be-rabt huī jaatī hai taqrīr hamārī

ye kahte hī bas mar gayā nākām-e-mohabbat

tum bhī na hamāre hue taqdīr hamārī

'ālim' falak-e-tafraqa-pardāz kā Dar hai

bante hī bigaḌ jaa.e na taqdīr hamārī

aaKHir na chali koi bhi tadbir hamari

ban ban ke bigaDne lagi taqdir hamari

ye ishq ke hathon hui tauqir hamari

bazaron mein bikne lagi taswir hamari

is tarah ke din raat dikhati hai karishme

taqdir pas-e-parda-e-tadbir hamari

jaldi na karo dhaar hai KHanjar pe abhi to

ho lene do sabit koi taqsir hamari

kuchh KHun ki chhinTen kahin ashkon ki nami hai

jati hai ajab shan se tahrir hamari

har samt dahak uThti hai ek aag jahan mein

lo deti hai jab raat ko zanjir hamari

bas Dal lo chehre pe naqab apne KHudara

be-rabt hui jati hai taqrir hamari

ye kahte hi bas mar gaya nakaam-e-mohabbat

tum bhi na hamare hue taqdir hamari

'alim' falak-e-tafraqa-pardaz ka Dar hai

bante hi bigaD jae na taqdir hamari