آخری بار بس اتنی سی وفا کرنا دوست

آخری بار بس اتنی سی وفا کرنا دوست

ہاتھ اٹھے تو مرے حق میں دعا کرنا دوست

ہم جو سادات کے نوکر ہیں سو آتا ہے ہمیں

نوک نیزہ پہ بھی آشوب نوا کرنا دوست

ایک بڑھیا جو بلک کر یہ جبیں چومتی ہو

اتنا آسان نہیں اس کو جدا کرنا دوست

جب بھی وحشت کے سبب چیخنے لگ جائے بدن

ایسا کرنا کہ مرا نام جپا کرنا دوست

بے ردائی ہی میں بخشا گیا دنیا کو شعور

اپنی زلفوں کو بھی عصمت کی ردا کرنا دوست

تجھ سے جو شمع فروزاں ہو فروزاں ہی رہے

میرے بھی نام کوئی ایک دیا کرنا دوست